Udalekuak

UDA BETE ABENTURA, EUSKARAZ, ZURE ESKURA!
Udan ere euskaraz bizi nahi duenak horretarako aukera ezin hobea du EUSKAL UDALEKUETAN.
40 urte baino gehiago pasa dira euskara hutsezko udalekuak antolatzen hasi ginenetik, eta gaur egun ere hasiera hartako asmo eta ilusio berberak ditugu Abaigar, Goñi eta Bernedoko Euskal Udalekuetan gabiltzan hezitzaileok.
Lan boluntarioa eginez, Euskal Herri osotik gure artera datozen ume eta gazteei udan ere euskaraz bizitzeko eta gozatzeko aukera eskaintzen diegu.
BIZI EZAZU UDA EUSKARATIK ETA EUSKARAZ!
ZATOZ EUSKAL UDALEKUETARA!

Captura de pantalla 2020-01-13 a las 14.01.15

Oharrak:

  1. Euskal Udalekuetan euskara hutsean bizi gara! Beraz, ez ezazue euskaraz ez dakien ume edo gazterik bidali!
  2. Izen-ematea, martxoaren 2tik aurrera.
    Izen-ematea egiteko, gure webgunean (www.udalekuak.eus) dagoen fitxa bete beharko duzue. Gehienez, 3 haurren/gazteren eskaerak onartuko dira eta, asko jota, taldeak 3koak izango dira. Mesedez, ez ezazue izen-ematea errepikatu. Batetik, zuon umeek/gazteek ez dutelako parte hartzeko aukera gehiago izango; eta, bestetik, horrek bulegoko lana ikaragarri zailtzen duelako.
  3. Izen-ematea egin aurretik, ondo begiratu zein den umeari/gazteari dagokion txanda. Aukera gehiago egoten da abuztuko txandetan.
  4. Txandak guztiz bete arte zabalik egongo da izen-emate epea. Martxoaren 16tik aurrera, plaza baino eskaera gehiago dauden txandetan aukeraketa egingo da. Aukeraketa ez dugu zozketa bidez egiten. Hainbat irizpide hartzen ditugu kontuan: parekidetasuna, ahalik eta herri gehienetako jendearen parte-hartzea etab.
  5. Apirilaren 1ean jakinaraziko zaizue zuen umea/gaztea aukeratu dugun ala ez. Web orrian aukeratu eta ez aukeratu zerrendak egongo dira. Izen ematearen identifikazio zenbakia erabili beharko da, izen ematea egitean eta bueltako emailean agertzen da. Aukeratuei informazio gehiago  emailez bidaliko zaie.
  6. Gurekin harremanetan jartzeko:
    • Telefonoz: Goizeko 10.00etatik 12.00ak arte eta 18.00etatik 20.00ak arte (678011708 eta 945107314)
    • Emailez: udalekuak@udalekuak.eus

Izena eman Euskal Udalekuetako txandetan

Ezagutu hiru etxeak

Abaigar

Abaigar gari soroetan murgildurik dagoen herri txiki bat da, eguraldi atseginaz gozatzeko igerilekua duena. Goizetik gauera harreman osasuntsuak sortzea da helburua, askatasun zurrunbiloaren bila.

Bernedo

Urtero herria eta igerilekua alaitzeko asmoz abiatzen gara Bernedora. Guztiok barruan dugun jolasteko sena piztea da helburua, eta naturarekiko konpromisoa eta geure arteko harreman osasungarriak sustatzen ditugu.

Goñi

Goñiko piratekin mila abentura bizitzeko irekitzen dira Dorrekoako ateak. Etxeaz bezainbeste gozatzen da Goñin bertako zuhaitzez eta zelaiez. Lurra, zura, harria… Denak du bere tokia gure bidean.