KAIXO, LAGUN!!

Abaigarko udalekuko kideok laguntza eske gatoz. Gure euskal udalekuak euskarazko aisialdia eskaintzen du 70eko hamarkadatik, Lizarrerrian, Abaigarko herrixkan. Azken urteotan, hala ere, nahikoa buruhauste izan ditugu.

Abaigarko Udalak 2016an eskatu zigun udalekuetarako erabiltzen dugun etxeak segurtasun neurri batzuk bete zitzala: larrialdietarako irteera egokitzea, suteen kontrako baldintzak betetzea, irisgarritasuna bermatzea… Abaigarko udalekuek etorkizuna izan dezaten, baldintza horiek bete behar ditugu nahitaez, eta horretarako, obra handi batean sartu berri gara.

Azken hiru urteotan, batetik bestera ibili gara udalekuak antolatzen: 2016an, udaleku ibiltariak antolatu genituen, eta Urdirotzen ere izan ginen tarte batez; 2017an, atsekabe handiz, udalekuak ez egitea eta proiektuari beste ikuspuntu batetik heltzea erabaki genuen; eta aurtengo udan, berriz, Ozaetan izan gara.

Baina datorren urtean, etxera bueltatuko gara! Udalekuak Abaigarren egingo ditugu berriro!

Urri hasieran ekin diegu egokitze lanei. Obra egiteko aurrekontua 300.000€-koa da, eta, gastu horri aurre egiteko 100.000€ aurreztuta ditugun arren, gainerako zatia ordaintzeko laguntza behar dugu.

Finantzaketa Koop57 erakundearen bidez egingo dugu. Mailegua lortzeko, ordea, jasoko dugun kopuru berbera norbanakoek bermatzea lortu behar dugu. Bi arrazoirengatik erabaki dugu mailegua Koop57rekin bideratzea: batetik, pentsatu dugulako horrek udalekuen proiektuarekin dugun konpromisoa indartzeko balio dezakeela, eta bestetik, Koop57 eraldaketa sozial eta solidariorako inplikazioa duen entitatea delako eta ohiko banketxeek izan ohi ez dituzten balioak lantzen dituelako.

Abal mankomunatuen bidez, Koop57k bermetan jaso dugun kopuruaren finantzaketa emango dio gure udalekuari, Pitxilore aisialdi elkarteari, Abaigarko etxearen egokitze lanak egiteko. Abal emaileak ez du dirua fisikoki jarri behar; horren ordez, agiri bat sinatu behar du, Pitxilorek mailegua ordaintzeari utziko balio abalatu duen kopurua jarriko lukeela esanez. Mailegua amortizatzen goazen heinean, abal emailearen erantzukizuna ere proportzionalki joango da murrizten.

Hala ere, kasurik okerrenean Pitxilorek mailegua ordaintzeko dirurik aterako ez balu, gure gain hartuko genuke erantzukizuna, abal emaileek ordaindu beharrik izan ez dezaten; hala, beharrezkoa balitz, etxea saltzeko prest geundeke zorra kitatzeko. Pitxilore aisialdi elkartean gabiltzanok argi dugu proiektuak aurrera egitea nahi dugula, eta konpromisoa hartua dugu abala eman digutenekin. Beraz, geure esku dagoen guztia egingo dugu muturreko egoera horretara ez iristeko.

Norberaren aukeren araberako abalak jarriko ditugu, hiru mailatan banatuta: 1.000, 2.500 eta 5.000 eurokoak. Nahikoa da inprimaki hau  betetzea, sinatzea eta NANaren fotokopia batekin batera bidaltzea helbide honetara:

PITXILORE AISIALDI ELKARTEA
FLORIDA 137 B
20120 Hernani – Gipuzkoa-

Gaiaren inguruan xehetasun gehiago emateko, urriaren 19an bilduko gara Hernaniko Biteri kultur etxean, arratsaldeko 7etan. Bilera ireki horretan, Koop57 erakundeko kide bat ere izango dugu gurekin, maileguaren inguruko argibideak emateko.

Horrez gain, e-posta bidez ere zalantzak argitzeko prest gaude; beraz, nahi izanez gero, jarri gurekin harremanetan abaigarudalekuak@gmail.com helbidean.

Mesedez, gaiaren inguruan interesa izan lezakeen inor ezagutzen baduzu, asko eskertuko dizugu mezu hau zabaltzen laguntzea.

Agur bero bat eta laster arte!!

Abaigarren, 2018ko urriaren 9an